👋 Вітаю, шаноўныя падпісчыкі рассылак Аляхновіча.
Спадзяюся, у вас усё добра на працы. У мяне, здаецца, яна таксама яшчэ ёсць. Амаль кожны дзень на мінулым тыдні мінімум тры гадзіны былі прысвечаны кар'ерным пытанням. Гэта былі такія духавымальныя міні-сумоўі, напоўненыя рэфлексіяй, цяжкімі пытаннямі і карыснымі высновамі.
Ці будуць яны актуальнымі ў свеце, дзе нейрасеткамі імкнуцца зменшыць расходы на утрыманне працоўнай сілы? Спадзяюся, што так.
AI пакрысе выштурхвае людзей з працоўных месц, працоўны ландшафт стае ўсё больш непрадказальным. З аднаго боку сайты Indeed і Glassdoor, фірмы па пошуку працы і ацэнцы супрацоўнікаў, звальняюць агулам 1300 чалавек з фармулёўкамі "AI змяняе свет і нам трэба адаптавацца". Індустрыя Human Resources патрабуе ўсё менш human. Ох, іронія.
Рэкруцёры карыстаюць AI, каб адсейваць тысячы рэзюме на адную вакансію, а кандыдаты ўзбройваюць ботаў нейрасеткавымі мазгамі, каб гэты вялікі фільтр прайсці. Індустрыя прыходзіць да думкі, што рэзюмэ памірае, таму ўсё больш кампаній пачынаюць эксперыментаваць з іншымі фарматамі: онлайн-сесіямі па рашэнні задач, партфоліа, тэставымі днямі. Усё тое, што цяжка падрабіць або аўтаматызаваць.
З іншага боку, некаторыя фірмы, што моцна разлічвалі на AI, цяпер вымушаныя наймаць human-аў, што зробяць добра. Спалілі электрычнасць, засралі атмасферу CO2, заплацілі за галюцынацыі, а потым заплацілі яшчэ раз за тое, каб усё выправіць.
Са свайго досведу скажу адное: лепш адразу рабіць добра і самому, чым спадзявацца на кагосьці і затым разбірацца ў чужой пісаніне і перапісваць яе.
Вось і даследаванне, якое гэтую думку падтрымлівае. Міжнародная даследчая група METR (Model Evaluation and Threat Research) правяла эксперымент з удзелам 16 дасведчаных распрацоўшчыкаў, якія працуюць з вялікімі опенсорснымі праектамі. Ім далі 246 розных заданняў – выпраўленні памылак, новыя функцыі, рэфактарынг – і падзялілі гэтыя заданні на дзве часткі: з выкарыстаннем AI-інструментаў і без. Атрымалася, што праца з AI замест чаканых плюс 20% да хуткасці дала мінус 19%. Так, замест "кодзіць не перакодзіць", атрымалі "марудзіць не перамарудзіць".
А таму, пакуль ёсць магчымасць, не прамініце позіркам крафтавую людзкую плынь свядомасці, што правядзе вас па важных цікавостках са свету тэхналогій і круху гульняў.
Але спярша маю пытанне! Ці сустракаліся калі-небудзь Лінус Торвальдс і Біл Гейтс асабіста?
Першая сустрэча Гейтса і Торвальдса
Гэта неяк дзіўна, але Лінус Торвальдс, стваральнік ядра Linux, і Біл Гейтс, сузаснавальнік Microsoft, ніколі не сустракаліся. Здавалася б, такія знакавыя постаці для сучаснага лічбавага свету, але вядомыя адно адному былі толькі завочна. І вось абодва сустрэліся упершыню асабіста на вячэры, арганізаванай стваральнікам Sysinternals Маркам Русіновічам.
Па праўдзе кажучы, я не адразу паверыў ў сапраўднасць гэтага здымку, бо ў эпоху нейрасеткавых відэамадэляў усё вынятковая трэба ставіць пад сумнеў. Але затым прыгледзеўся да швэдара Біла Гейтса і зразумеў, гэты здымак мільярдэра — сапраўдны. Ëн не так даўно разыйшоўся з жонкай, а ўжо выглядае даволі неахайна.
Справа на здымку, дарэчы, легендарны Дэйв Катлер – чалавек, што кіраваў распрацоўкай Windows NT. Інжынеры Windows раней баяліся атрымліваць ад яго водгукі па коду. Калі яму нешта не падабалася, значыць, гэтага не было. Кропка. Неверагодна ўплывовы чалавек. Ëн з Лінусам таксама ніколі не сустракаўся ўжывую.
G. Pascal Zachary
«Ніякіх сур'ёзных рашэнняў па ядры не прымалася», — жартуе Русіновіч у паведамленні на LinkedIn.
Бабка з камнем
Гарачай тэмай для дыскусій на мінулым тыдні стала вось гэтае згенераванае нейрасеткай відэа бабкі з камнем, што разбівае шкляны мост сваім азадкам.
Яно сабрала ў розных алгарытмічных сметніцах штосьці каля 100 мільёнаў мільярдаў праглядаў. Калі раней 99% дзікунскага кантэнту ў сеціве было сапраўдным. Ну ці мінімум пастановачным. То цяпер кілаваты энергіі будуць сыходзіць на стварэнне і прагляд вось такога.
Не ведаю, ці ёсць у нас нейкія шансы на светлую будучыню. Мой тэхнааптымізм за апошнія гады цалкам выветрыўся.
This is an Xbox. Until it not
Microsoft пачала маштабную кампанію This is an Xbox. I цяпер гэта не проста слоган, а цэлая філасофія. У многіх Xbox усё яшчэ асацыюецца з кансоллю – пластыкавай скрыняй, што стаіць пад тэлевізарам і дазваляе бавіць час у гульнях. Але карпарацыя хоча пераканаць нас: Xbox – гэта цяпер і смартфон, і ноўтбук, і гульнявы планшэт, і нават VR-шлем.