Кур'ёзнае здарэнне адбылося з абцякальнікам карыснай нагрузкі новай аўстралійскай ракеты. Ëн павінен быў аддзяліцца праз некалькі хвілін ПАСЛЯ старту, але адваліўся за некалькі гадзін ДА старту: "электрычная няспраўнасць прывяла да спрацоўвання сістэмы, якая адкрывае насавы абцякальнік ракеты (абцякальнік карыснай нагрузкі)" – паведаміла кампанія Gilmour Space.
Gilmour Space Technologies
Першая арбітальная ракета кампаніі Gilmour Space не змагла стартаваць. Сама ракета і пляцоўка не пацярпелі, але запуск адкладзены.
На борце няўдалай місіі не было спадарожнікаў, бо гэта быў тэставы запуск. Кампанія паведаміла, што правядзе поўнае расследаванне і заменіць конус.
Gilmour Space — адзін з флагманаў аўстралійскага касмічнага стартап-сектара, заснаваны ў 2012 годзе. Сёння ў кампаніі працуе больш за 200 інжынераў і тэхнікаў.
Запуск ракеты Eris меў стаць гістарычнай падзеяй — першы аўстралійскі носьбіт, што дасягнуў бы арбіты. Дарэчы, апошнія запускі з тэрыторыі Аўстраліі адбываліся яшчэ ў 60-я гады — і тое былі амерыканскія і брытанскія ракеты.
У Gilmour Space уклалі каля $90 млн, у тым ліку дзяржаўныя грошы. Надзеі вялікія.
Eris — гэта ракета вышынёй 25 метраў, здольная дастаўляць да 305 кг на нізкую каляземную арбіту. Яна мае 3 ступені з гібрыднымі рухавікамі, што рэдка сустракаецца ў сучасных запусковых сістэмах — гэта рэдкая тэхналогія, якая спалучае ў сабе перавагі цвёрдага і вадкага паліва.
Кампанія адзначае, што галоўная мэта запуску — 10–20 секунд стабільнага палёту, каб сабраць дадзеныя для будучых місій. Дарэчы, іншыя кампаніі, як SpaceX, таксама не з першага разу дасягалі арбіты. А яшчэ на борце будзе слоік Vegemite – папулярнай аўстралійскай пасты.
Абмеркаванне