Даехаць з Польшчы да Літвы цягніком даволі няпростая задача. Розніца ў шырыні чыгуначнай каляі паміж двумя краінамі — 85 мм (1520 мм у Літве і СНД, 1435 мм у Польшчы і Еўропе) — здавалася б зусім невялікая, даўжынёй у палец, але адчувальная.
Дык вось, прамая чыгуначная сувязь паміж краінамі Балтыі і астатнімі краінамі Еўрасаюза адсутнічае. Ужо больш за дзесяцігоддзе ідзе праца над праектам Rail Baltica, які павінен вырашыць гэтую недарэчнасць і злучыць еўрапейскай каляінай Варшаву, Вільню, Рыгу і Талін. Але рухаецца ён не так хутка, як таго хацелася б.
Таму адзіны варыянт патрапіць з Беластока да Вільні – сесці на цягнік IC 144-HAŃCZA, што рухаецца з Кракава да Вільні з прамой перасадкай на польска-літоўскай мяжы на прыпынку Моцкава. Ходзіць гэты цягнік кожны дзень. Стаіць у Беластоку дзесьці паўгадзіны і ў 10:30 рушыць на поўнач.