У красавіку 2025 года серыялы былі вельмі розныя — ад працягаў культавых гісторый да дзіўных навінак, пра якія цяжка забыцца. У новым выпуску кіназнічкі абмяркоўваем усё самае вартае ўвагі: ад “Чорнага люстэрка” і “The Last of Us”, да эмацыйнага “Dying for Sex” і сюррэалістычнага “The Rehearsal”. Калі серыялы для вас — больш чым проста фонавы гул, гэтае відэа не прапусціце!

Яны ўсё ж такі гэта зрабілі. Афіцыйна – брытанскі актор Паапа Эсьеду будзе граць Северуса Снэйпа ў серыяльнай адаптацыі кнігаў Джаан Роўлінг пра Гары Потэра. Мне гэтая рашэнне незразумелае, бо цёмная скура актора дадасць непрадугледжаны Роўлінг дадатковы слой персанажу. Пэўна ўвядзе нейкія расісцкія наратывы. Крыху стаміла. Але ж відаць і актор добры, і серыял здымаюць не для мяне – стомленага 35-гадовага скуфа, што вырас на прыгодах Потэра. Ды і плаціць за яго прагляд я не збіраюся, здымайце хоць абздымайцеся.

Апроч гэтага канфліктнага выбару афіцыйна сталі вядомы і некаторыя іншыя асобы, што будуць граць у будучым серыяле. Ужо вядомы нам Джон Літгоў у ролі Альбуса Дамблдора, Джанэт Макцір у ролі Мінервы Макгонагал, Нік Фрост у ролі Хагрыда, Люк Таллон у ролі прафесара Квірэла, Пол Ўайтхаўс у ролі Аргуса Філча і Віталь Аляхновіч у ролі незадаволенага дзеда перад тэлеэкранам.

Сёння засяродзімся на галоўных серыяльных прэм’ерах красавіка. Што ўжо выйшла і атрымала адзнакі крытыкаў?

Black Mirror S7

Ужо сем сезонаў Чорнае люстэрка паспяхова трымае нас у напружанні і прымушае задумацца: што калі тэхналогіі не такія ўжо і бяскрыўдныя? Новы, сёмы сезон культавай серыяльнай анталогіі з'явіўся на Netflix 10 красавіка!