Я паставіў на паўзу Clair Obscure: Expedition 33. Лічыў, што ніхто не пахісне маёй упэўненасці ў тым, што KCD 2 мусіць стаць гульнёй года. А тут бачыш як, нечакана паглынальная гульня з загадкавым сюжэтам і прыемнай баёўкай: пакрокава і сюжэтна насычана. Лічы мой ідэал.
Вечарок пагуляў і да справы! Выконваю свой абавязак і прадстаўляю вам дадатковыя матэрыялы да падкасту! Але, спачатку на палях, крыху пра планы. Наступным ролікам усё ж такі будзе стэндалон-відэа на канале "аляхновіч" пра касмічную самоту. Чарнавік для яго ўжо пакрыўся пылам, трэба ратаваць. Відзік крыху пасунем на пачатак наступнага тыдня і зробім карацейшым. Там цвіком выпуску будуць рэдказямельныя металы і чаму менавіта Кітай кантралюе тыя крохі, без якіх сучасны электронны свет ператворыцца назад у аналагавы.
Тэхна-феадалізм і Антыхрыст
Вялікую ўступную частку 61-га выпуска падкасту "Відзік" справакаваў матэрыял на сайце The Washington Post, прысвечаны шырока вядомаму ў вузкіх колах мільярдэру Пітэру Цілю. Ëн цягам месяца ў Сан-Францыска правёў чатыры закрытыя сакрэтныя лекцыі на тэму Антыхрыстаў, якія хочуць спыніць тэхналагічны прагрэс. І паралельна закрануў тэму таго, што ягоная ўлада, пабудаваная на грошах, можа ў любы момант знікнуць, калі гэтага захоча дзяржава. А таму дзяржаўныя абмежаванні – гэта кепска.
Відавочна, не змог абмінуць увагай "Тэхна-аптымістычны маніфест" Марка Адрээсэна – венчурнага капіталіста з Крэмніевай даліны. Два гады таму ён моцна гудзеў асноўнай ідэяй, што "этычнасць – для слабакоў", а мы мусім рухацца з развіццём тэхналогій хутка і без абмежаванняў. Гэта пераклікаецца з ідэямі Ціля.
Агулам у сэрцы тэхналагічнай Крэмніевай даліны назіраецца зрух у права і да рэлігійнасці. І гэта не можа не трывожыць. Бо рэлігія – гэта опіўм для мазгоў, якая сваім пад'ёмам можа сведчыць пра надыход цёмных часоў.
Успомніў таксама гісторыю пра бункер Марка Цукерберга. Ëн вельмі моцна насаліў жыхарам аднаго з Гавайскіх астравоў, калі за 270 мільёнаў вырашыў збудаваць сабе гняздо.
Першы ШІ-кінасусвет
Адзін чалавек па імені Джош Кэрыган ужо збудаваў цэлы сусвет без іх удзелу. Ён стварае Neural Viz – кінематаграфічны мультысусвет, дзе акцёраў замянілі мадэлі Midjourney, ElevenLabs і Runway, а сцэнічныя глуроны спрачаюцца пра рэлікты чалавецтва, якога з'елі эскалатары. Іронія ў тым, што Кэрыган робіць усё тое, чаго баіцца традыцыйны Галівуд: выкарыстоўвае штучны розум не замест чалавека, а як працяг свайго уяўлення.
У эпоху, калі нейрасеткі вінавацяць у знішчэнні творчасці, Кэрыган паказвае, што ўсё наадварот: ён вяртае творчасць тым, хто яшчэ ўмее марыць. Neural Viz – гэта не чарговая аўтагенерацыя, а DIY-рэвалюцыя: новы Flash-рух, дзе адзін чалавек можа пабудаваць цэлую галактыку гісторый. Масяня, прывет!
Windows 10 выходзіць на пенсію, Microsoft заводзіць новага “разумнага суседа”
Microsoft урачыста пахавала Windows 10, але карыстальнікі не спяшаюцца кідаць кветкі. Амаль палова ўсіх віндаводаў па-ранейшаму сядзіць на 10-цы, якая працуе стабільна і не спрабуе гаварыць з табой, пакуль ты адкрываеш Excel. У Redmond гэта разумеюць, таму разам з канцом падтрымкі яны запусцілі праграму пашыранай бяспекі – платную, вядома. Карацей, Windows 10 жыве, проста цяпер яна робіць гэта па падпісцы.
